Компанијата Делта Холдинг на Мирослав Мишковиќ ги продала трговските центри Делта сити во Белград, потврдуваат за српски Б92 официјални претставници.

Купувач е јужноафричкиот инвестиционен фонд „Хипроп инвестмен лимитед“, кој објави дека од српската компанија Делта риелстејт, која е дел од Делта холдингот, ги купил трговските центри Делта цити во Белград и Подгорица за 202,75 милиони евра.

Како што наведува купувачот, Делта сити е купен за 127,75 милиони евра, од кои 112 милиони е продажна цена, додека со нешто помалку од 16 милиони евра ќе бидат исплатени постоечките долгови за банките.

Делта сити во Подгорица е продаден за 75 милиони евра, од кои 60 милиони е цената за самиот објект додека со нешто помалку од 15 милиони евра ќе бидат исплатени банкарските заеми.

Претходно компанијата Делта холдинг по повод медиумските написи дека шопинг центарот е продаден, соопшти дека се што е во сопственост на Делта има потенцијал да се продаде, но дека засега ништо не е продадено.

„Но ако наиде добар купувач, односно добра понуда, ќе размислиме“, речено е тогаш.

Претседателот на компанијата Мирослав Мишковиќ изјавил неодамна дека менаџментот на Делта холдингот е во сериозни преговори за продажба на трговските центри „Делта сити“ на Нов Белград и во Подгорица, со објаснување дека сите тие слични потези во последно време се повлекуваат „бидејќи не е добро сите јајца да бидат во една корпа“.