АД „Македонијатурист“ го продаде хотелот Бристол во центарот на Скопје. Според податоците на Агенцијата за катастар на недвижности, нов сопственик е ГМ Проперти. Сумата на купопродажбата засега останува непозната, а единствено тоа можно е да биде објавена во наредниот период како информација на Македонска берза.

ГМ Проперти е фирма која е основана во октомври 2024 за услужни дејности. Во текот на минатата година немала приходи, а единствено податоците од Централниот регистар покажуваат дека е под финансиска изложеност со подигнато банкарско кредитирање од 5 милиони евра.

Единствен сопственик на ГМ Проперти во моментов е Емил Кратовалиев,член на Управниот одбор на Уника (Друштво за осигурување СИГАЛ Иншуренс Груп АД Скопје). Основач заедно со Кратовалиев бил и Зоран Антиќ, но сопственикот на МГ Фешн и акционер на „Македонијатурист“ излегол од сопствеништвото во текот на есента минатата година.

Компанијата во мај донесе одлука да ги отуѓи хотелите „Бристол“ и „Јадран“, познат и како Арапска куќа, заедно со дополнителен недвижен имот во централното градско подрачје. Одлуката беше усвоена на седница на Собранието на акционери одржана на 22 мај, а информацијата беше објавена преку Македонската берза.

Хотел „Бристол“ во Скопје е еден од најзначајните историски хотели во Македонија и се смета за најстариот сочуван хотелски објект во градот. Изграден е во 1923 година по нарачка на познатите скопски трговци Атанас (Ташко) и Ристо Караџа, а свечено бил отворен на 24 април 1924 година. 

Сместен е на денешната улица „Македонија“, во непосредна близина на тогашната Железничка станица, а историски гледано бил еден од главните места за престој на патници, трговци, дипломати и јавни личности кои доаѓале во Скопје. Во периодот меѓу двете светски војни и со децении по нив, „Бристол“ бил симбол на скопскиот боемски живот. Познато е дека хотелот располага со 33 соби, ресторан и придружни содржини