Премиерот на Албанија Еди Рама поднесе во основниот суд во Приштина тужба за клевета против косовскиот премиер во заминување Рамуш Харадинај за наводна размена на територија. Доцна синоќа Харадинај врати и рече дека Рама бега од одговорност.

Албанските медиуми пренесоа вечерта дека тужбата е напишана на над 30 страници и дека во неа се наведува дека Харадинај во неколку ТВ емисии во октомври минатата година го „обвинил Рама дека со Хашим Тачи и Александар Вучиќ покренал идеја за размена на територија меѓу Косово и Србија“.

„Тужбата на премиерот Рама е целосно неосновна и негова политичка диверзија како да се сокрие и со медиумска драма да избегне одговорност. Нашиот народ и Косово имаат луѓе кои ќе бидат браник во секој случај - напиша Харадинај на Фејсбук синоќа.