Арменд Фазлиу, шеф на кабинет на директорот на „Македонска пошта“ Рафиз Алити доби затворска казна во траење од две години, откако судот одлучи дека тој е виновен за пожарот кој избувна во главната управна зграда на Поштата лани. Во пожарот немаше жртви или повредени, но беше предизвикана значителна материјална штета од 100 илјади евра, а беше уништен и муралот на Борко Лазевски од непроценлива вредност. Обвинението го товареше Фазлиу за тешки дела против општата безбедност, но тој го негираше делото. Одбраната тврдеше дека причина за пожарот е неисправна електрична инсталација, но вештачењето не го потврди тоа. Во негова одбрана застана и директорот Рафиз Алити, кој најави дека од Фазлиу нема да бара одговорност, а штетата ќе ја покрие осигурителната компанија. Сепак, последниот ревизорски извештај за работата на „Македонска пошта“ открива дека ваквата исплата е многу неизвесна, со оглед на тоа што договорот со осигурителната компанија бил склучен со задоцнување, по настанувањето на пожарот, а не постојат гаранции дека осигурителната компанија е подготвена да врши исплати за штета ретроактивно. До изрекувањето на пресудата, Фазлиу кој е внук на Алити, се бранеше од слобода.