Податоците на Државниот завод за статистика,покажуваат дека  раководителите ја оценуваат економската состојба на деловните субјекти во април 2013 година како поповолна во однос на претходниот месец, a како понеповолна во однос на април 2012 година. Обемот на производството во април 2013 година е поповолен во однос на претходниот месец, очекувањата за обемот на производството во наредните три месеци се поповолни, како и очекувањата за бројот на вработените. Во април 2013 година, залихите на суровини и репроматеријали, како и тековните набавки на суровини и репроматеријали се под и околу нормалата. Залихите на готовите производи во април 2013 година се зголемени во споредба со претходниот месец. Просечното искористување на капацитетите на деловните субјекти во април 2013 година изнесува 60.7% од нормалното искористување. Најголемо влијание на ограничувањето на обемот на производство во април 2013 година имаат следните фактори: недоволната странска побарувачка со 26.8%, недоволната домашна побарувачка со 20.6%, финансиските проблеми со 10.4% и неизвесното економско опкружување со 9.4%.