Бранот украински напади врз руската енергетска инфраструктура го турна обемот на рафинирање на сурова нафта во Русија на најниско ниво за повеќе од 21 година, продлабочувајќи го недостигот на гориво на домашниот пазар и дополнително интензивирајќи го притисокот врз глобалниот пазар на нафтени деривати.

Според EA Analytics, руските рафинерии овој месец преработувале просечно 3,91 милиони барели сурова нафта дневно, што е најмал обем на преработка од март 2005 година. Ова е за повеќе од 1,4 милиони барели дневно помалку отколку во истиот период минатата година.

Поради остриот пад на производството, руските власти воведоа забрана за извоз на повеќето видови дизел до крајот на јули, покрај претходните ограничувања за извоз на бензин и гориво за авиони. Исчезнувањето на дизелот од еден од клучните светски извозници ги зголеми цените на ова гориво на највисоко ниво во последните неколку години, додека пазарот веќе е под притисок од прекините во снабдувањето од Блискиот Исток, пишува Блумберг.

Бидејќи Русија ги класифицираше податоците за работењето на рафинериите како доверливи, независните проценки се потпираат на алтернативни извори. EA Analytics, истражувачката единица на консултантската компанија Energy Aspects, го проценува производството преку следење на целиот синџир на снабдување - од сателитско следење на нафтените полиња и магацините до следење во реално време на движењата на танкерите.

Според проценките на Меѓународната агенција за енергија (IEA), руските рафинерии преработиле околу 3,8 милиони барели дневно во јуни, или 1,6 милиони барели помалку од претходната година.

IEA наведува дека од почетокот на мај, повеќе од половина од капацитетот за рафинирање на Русија е погоден од интензивни украински напади.

Според податоците собрани од Блумберг врз основа на јавни изјави од двете страни, украинските сили извршиле околу 50 напади врз руски погони за производство на гориво во последните 100 дена, погодувајќи најмалку 24 од вкупно 34 големи рафинерии, претежно во сопственост на најголемите руски нафтени компании.

Киев ги интензивираше нападите врз енергетската инфраструктура за да го зголеми притисокот врз Москва, а беспилотните летала сега можат да стигнат до цели на повеќе од 2.400 километри од украинската граница. Овој месец, беше погодена и најголемата руска рафинерија во регионот Омск, која главно го снабдува домашниот пазар.

Нападите дополнително ги влошија снабдувањето со гориво низ цела Русија. Во бројни региони, од Калининград на Балтичкото Море до рускиот Далечен Исток, се пријавени недостатоци, има редици на бензинските пумпи и нагло зголемување на малопродажните цени на горивата.

Рускиот вицепремиер Александар Новак, кој е задолжен за енергетскиот сектор, призна дека има проблеми со снабдувањето и недостиг, поради што секојдневно се одржуваат состаноци посветени на стабилизирање на пазарот.