Површинските температури на Пацификот моментално се далеку над просекот, што јасно сигнализира враќање на климатскиот феномен Ел Нињо. Според Светската метеоролошка организација (WMO), веројатноста за развој на Ел Нињо помеѓу јуни и август достигна 80 проценти, а постои 90 проценти шанса дека ќе трае барем до ноември. „Условите на Ел Нињо додаваат масло на огнот на глобалното затоплување“, предупреди генералниот секретар на Обединетите нации, Антонио Гутереш. Генералната секретарка на WMO, Селесте Сауло, повика на итни подготовки. „Мора да се подготвиме за потенцијално силен Ел Нињо што ќе ги влоши сушите и обилните дождови и ќе го зголеми ризикот од топлотни бранови и на копно и на океан“, рече таа.

Ел Нињо е природен климатски феномен што се јавува во просек на секои две до седум години. Се карактеризира со затоплување на површинските води во централниот и источниот Пацифик, што доведува до значителни промени во глобалните временски модели. За време на Ел Нињо, топлата вода и облаците се движат кон бреговите на Јужна Америка, што често резултира со сериозни поплави во Јужна Америка и делови од Источна Африка, сериозни суши и зголемен ризик од шумски пожари во Југоисточна Азија, Австралија и Југоисточна Африка, објавува „Кронен Цајтунг“.

За Европа, влијанието на овогодинешниот Ел Нињо ќе биде релативно ограничено, велат експертите. „Ова е главно затоа што Европа е многу далеку од тропскиот Пацифик, а додека сигналот стигне до нас, тој е нарушен од многу други атмосферски и океански влијанија“, објасни Даниела Домајзен од ETH Zurich. Сепак, се очекува Европа да доживее постудено и повлажно време од вообичаеното. Индиректните ефекти би можеле да бидат многу поголем проблем, бидејќи слабите жетви во регионот на Пацификот би можеле да доведат до повисоки цени на шеќерот, кафето и какаото на светскиот пазар. „Ова ќе има индиректни ефекти врз Европа“, предупреди климатологот Армин Бунде од Универзитетот во Гисен.

Вечерњи.хр