Европската комисија предупредува на потенцијални ризици за снабдувањето со енергенси, откако конфликтот на Блискиот Исток влезе во десеттата недела.

На состанокот на Групата за координација за нафта и Работната група за безбедност на енергетската унија, во кој учествуваа експерти од Европската комисија, индустријата, земјите членки, Меѓународната агенција за енергија и НАТО, главна тема беше безбедноста на снабдувањето со нафта и гас во Европа.

Како што беше посочено, најголема загриженост во моментов претставува авионското (млазно) гориво, бидејќи пазарот се соочува со притисоци поради намаленото снабдување.

Комерцијалните резерви се намалуваат како резултат на продолженото затворање на Ормускиот теснец, кој е клучна рута за транспорт на нафта на глобално ниво.

• „ЕУ треба да почне да се подготвува за потенцијалните последици доколку ситуацијата продолжи и по мај“, соопшти Европската комисија.

И покрај тоа, засега нема недостиг на гориво во Европската унија, а снабдувањето со гас останува стабилно, при што веќе започна и полнењето на складиштата.

Експертите посочуваат дека, доколку биде потребно, може да се активираат резервите на нафта и гас, но нагласуваат дека земјите членки ќе треба да дејствуваат координирано и усогласено за да се постигнат ефективни резултати.