Тројцата пратеници од дијаспората во новиот состав на македонското Собрание го следат трендот на популарните „селфи“ фотографии, па денешната конститутивна седница во Собранието ја „овековечија“ со заедничка фотографија споделена и на социјалните мрежи. За пратеникот од изборната единица која ги опфаќа американските континенти Павле Саздов ова ќе биде втор мандат во Собранието, додека Васко Наумовски е за првпат избран за пратеник од Австралија и Азија, а Ристо Манчев ќе ја претставува дијаспората од Европа и Африка. Сите тројца пратеници се од ВМРО-ДПМНЕ, а речиси сите останати партии кои имаа свои кандидати го оспорија гласањето во дијаспората. Реакции предизвика и малиот број гласови потребни за да се обезбеди пратеничко место во дијаспората заради малиот број пријавени гласачи. Така, според податоците од ДИК, на кандидатите во Австралија и Америка им биле доволни по околу 800 гласа за пратеничко столче, што многупати помалку од потребниот број гласови во изборните единици во Македонија.