Млекара АД Битола во ревидираниот финансиски извештај доставен до Македонска берза објави дека од оваа година е во целосна сопственост на ИМЛЕК АД Србија, со што практично е откриен и купувачот на преостанатите 24 отсто акции кои беа продадени во јануари годинава.

Во јануари официјалната информација беше дека се продадени 24,41 отсто од акциите на Млекара АД Битола по цена од 17.096 денари од акција на слободниот пазар, односно за вкупна сума од околу 7,37 милиони евра, што можеше да се претпостави дека некој го купува „пакетот“ на холандскиот партнер CEE Investments B.V.

„По датумот на составување на билансот, се случија измени во сопственичката структура на Друштвото. ИМЛЕК АД. Србија го зголеми својот удел од 74,6% на 99,0% и стана доминантен сопственик“, соопшти најголемата македонска млекарница во ревидираниот извештај кој деновиве беше поднесен до берзата.

Битолската млекарница како акционерско друштво кое не котира на македонската берза не беше должно да објави кој го купил уделот од околу 24 отсто, по блок-трансакцијата. До јануари 2026, ИМЛЕК Србија поседуваше 74,6 отсто од акциите, додека останатиот дел му припаѓаше на CEE Investments B.V. од Холандија.

Блок-трансакцијата се совпадна со најавениот период во кој требаше да се заокружи сопственичката трансформација на дел од млечната индустрија во регионот.