Производството на нафтени деривати во Рафинеријата во Панчево започна денес, а првиот евродизел ќе биде достапен на пумпите од 27 јануари, објави министерката за рударство и енергетика Дубравка Ѓедовиќ Хандановиќ.

„По речиси два месеци пауза, производството на нафтени деривати во Рафинеријата во Панчево започна денес! Речиси 2.000 вработени работат напорно на производството, а евродизелот ќе биде достапен на пумпите од 27 јануари“, изјави Ѓедовиќ Хандановиќ на Инстаграм.

Транспортот на сурова нафта до рафинеријата во Панчево започна во вторник оваа недела преку Јадранскиот нафтовод (ЈАНАФ).

Министерката Ѓедовиќ Хандановиќ во понеделник објави дека првата нафта ќе почне да пристигнува во вторник, 13 јануари, и дека околу 85.000 тони ќе бидат испорачани оваа недела.

На 9 јануари, компанијата НИС објави дека склучила договор за увоз на првите количини сурова нафта преку ЈАНАФ за потребите на рафинеријата во Панчево.