По непрекинатите врнежи од дожд жителите на Стајковци кои се во непосредна близина на Скопската обиколница се пожалија дека подрумите од куќите повторно им се поплавени и упатуваат апели за помош на социјалните мрежи, пренесува Мета. Според написите целосно е поплавена и улицата „6“ која се наоѓа на крајот на селото Стајковци, веднаш до обиколницата. - Дворот на мојата куќа е повторно поплавен и подрумите почнаа да се полнат. Инаку улица „6“ која се наоѓа веднаш до обиколницата е повторно поплавена, а луѓето се во паника. Подрумите и гаражите им се полнат со вода, сите стравуваат водата не им влезе и во домовите. Бараме помош од волонтери кои ќе ни помогнат во исцрпување на водата – напиша Марјан Алек Стевковски. Од Центарот за управување со кризи велат дека на нивните телефони никој не пријавил дека е поплавен и дека му треба помош.