Вкупно 108 милиони денари за поддршка и развој на научно- истражувачката дејност во земјата ќе додели годинава Министерството за образование и наука.  Ова е за 18 милони денари повеќе во однос на вложените средства минатата година. „Со 77 милони денари, практично со најголем дел од средствата, ќе се поддржи научно-истражувачкиот кадар со посебен акцент на младите кои се интерсираат во оваа област, затоа што нивното вклучување во научно-истражувачката работа превентивно делува на „одливот на мозоци“ од државата“, истакна министерот за образование Спиро Ристовски. Преку Програмата на научно-истражувачката дејност за 2014 година ќе бидат поддржани државните установи и граѓанските здруженија насочени кон науката, ќе се развива научно-истражувачкиот кадар и ќе се обезбеди мобилност и поврзување на домашното и меѓународно научно-истаржувачко искуство. Предвидена е и исплата на средства за објава на научно-истражувачки трудови во меѓународни списанија со импакт фактор, како и доделување на државни награди за постигање од интерес на државата во одредена научна област. Пари ќе има и за стипендии за студентите од втор и трет циклус во земјата и странство, а ќе се финансира и престојот на постдипломците и универзитетските професори од земјата во рамките на ЦЕЕПУС програмата.