Фабриката за коксирање Лукавац во близина на Тузла престана со работа во февруари оваа година по неколкумесечни финансиски проблеми и стечајна постапка, а повеќе од 800 работници ги загубија своите работни места.

Печките во Лукавац беа исклучени по 73 години од почетокот на производството, со што заврши работата на уште еден голем индустриски комплекс кој во изминатите две децении често беше на листата на десетте најголеми извозници од Босна и Херцеговина , објави порталот BHRT.

Фабриката за производство на кокс е создадена на бранот на забрзана индустријализација за време на Југославија, со цел овој производ да се користи во високи печки за производство на железо, во постројки како што е железарницата во Зеница.

Сепак, Железарницата Нова Зеница (NŽZ) исто така имаше лоши резултати минатата година, со загуба од речиси 97 милиони марки, а производството на челик беше прекинато во април 2026 година по повеќе од 130 години континуирано работење, објави Дојче Веле. 

Стотици работници се испратени дома на принуден годишен одмор, додека речиси 2.000 вработени се во неизвесност и се плашат дека ќе ги изгубат своите работни места. 

„Ова е најтешкиот ден и најголемиот пораз во мојот живот“, рече тогаш генералниот директор на компанијата, Ахмед Хамзиќ, пишува Б92.

Проблемот за железарницата во Зеница ескалираше кога Коксара Лукавац (порано ГИКИЛ) банкротираше на крајот од 2025 година, оставајќи ја високата печка во Зеница без домашни суровини.

Експертите предупредуваат дека пропаѓањето на фабриката за кокс во Лукавац и фабриката за железо во Зеница би можело да има многу пошироки негативни последици и да влијае на стотици други компании кои се поврзани со овие компании.