Поранешниот бугарски банкар и мнозински сопственик на банкротираната ЦЦБ, Цветан Василев, кој побегна во Србија, нема да биде предаден на бугарското правосудство. Ова го одлучи Апелациониот суд во Белград.

Со оваа одлука судот ја потврди одлуката на Врховниот суд, кој оцени дека не се исполнети законските услови за екстрадиција на Цветан Василев во Бугарија. Со овој акт на Апелациониот суд практично беше одбиено барањето на властите во Софија за екстрадиција на Василев од Србија. Во исто време, стана јасно дека Василев доби политички азил во Србија на 26 јули минатата година. Барањето за статус на политички бегалец е поднесено на 14 мај 2018 година до српското МВР

Откако Бугарија распиша меѓународна потерница за Цветан Василев, тој им се предаде на српските власти во септември 2014 година.

Според Апелацискиот суд во Белград, „постојат добри причини да се верува дека екстрадицијата на Василев ќе создаде ситуација во која тој би можел да биде подложен на тортура, нечовечко и понижувачко постапување, а во овој случај условите за азил се исполнети, бидејќи тој може да биде екстрадиран во неговата татковина поради неговите политички убедувања“.

Василев, поранешен мнозински акционер во банката, беше обвинет за вмешаност во 144 случаи на проневера и се соочува со ефективна казна од 10 до 20 години затвор. Во обвинението на 11.000 страници се наведени имињата на 18 обвинети кои дејствувале како криминална група одговорна за проневера на 2,6 милијарди лева (1,3 милијарди евра), што „ја загрозува стабилноста на бугарскиот банкарски систем и неговата финансиска сигурност“.

Десет дена пред да биде распишана потерницата на 28 јули 2014 година, Цветан Василев побегнал од Бугарија во Србија.

Во 2014 година, бугарскиот банкар и бизнисмен донираше 1,2 милиони динари на фондацијата на Драгица Николиќ, сопругата на тогашниот претседател на Србија. Информацијата ја потврди и поранешниот претседател Томислав Николиќ. Но, како што рече тогаш, донацијата била уплатена пред да се издаде налогот за Василев, а Николиќ негираше дека имал „лични контакти“ со бугарскиот бизнисмен.