Политичар од Балканот ќе плати казна поради говор на омраза. 

Претседателот на Република Српска, Милорад Додик, „заработи“ парична казна поради говор на омраза во текот на предизборната кампања.

Централната изборна комисија на Босна и Херцеговина го казни кандидатот на Сојузот на независните социјадемократи (СНСД) за член на Претседателството на БиХ од Република Српска, Милорад Додик, со пет илјади конвертибилни марки, околу 2.500 евра, поради говор на омраза во текот на предизборната кампања.

Партијата, пак, е казнета со седум илјади конвертибилни марки или околу 3.500 евра.

„Не предизборниот митинг во Билеќа на 22 септември Додик користел јазик што некого би можел да го наведе или да го поттикне на насилство или ширење омраза“- се наведува во одлуката.

Додик во говорот на 22 септември му се закани на Давор Драгичевиќ, татко на убиеното момче Давид Драгичевиќ, кој од 20 септември деноноќно престојува на плоштадот Краина во Бања Лука. 

„Што ќе прави тој. Изнел кревет на плоштадот и мисли дека е фраер. На 8 октомври веќе нема да го има“- кажал Додик.

Додик е казнет и затоа што на митингот му се заканувал на политичарот Дражен Дунџер.