По кратко боледување ноќеска во Мадрид почина 70-годишниот македонски новинар, политичар, амбасадор  Слободан Чашуле.

Роден во Скопје на 27 септември 1945 и поранешен министер за надворешни работи на Македонија во периодот 2001-2002 година.

Тој е син на познатиот македонски писател Коле Чашуле. Во 1972 година, Чашуле го завршил своето образование на Папскиот католички универзитет во Лима, Перу.

Слободан Чашуле беше еден од основачите на ТВ Скопје, дописник на ТВ Скопје во Чиле и Перу, дописник за Танјуг во Латинска Америка и Карибите, главен уредник на Танјуг во Македонија.

Од 1990-1994 е директор и главен уредник на Македонското радио, потоа генерален директор на „Нова Македонија”-Скопје.

На 30 ноември 2001, Чашуле стана министер за надворешни работи на Македонија, четврти по ред во Владата на Љубчо Георгиевски. Во 2002 година избран е за пратеник во македонското Собрание.

Чашуле беше и уредник на неделникот и веб-порталот Форум. Зборуваше англиски, шпански, португалски, француски и италијански.