По неодамнешниот инцидент во подгоричкaта населба Забјело, на кој државата одговори со привремено воведување визи за граѓаните на Турција, порталот „Банкар“ провери дали овие мерки имале влијание врз економските активности на граѓаните на таа земја - првенствено врз затворањето на нивните бизниси. Податоците покажуваат дека повеќе од 30 турски компании биле затворени во последниот месец, што значи дека во просек се затворала по една секој ден.

Според податоците што порталот „Банкар“ ги добил од Даночната управа, бројот на деловни субјекти чии основачи се физички лица кои се државјани на Турција регистрирани во 2025 година е 2.140. Во споредба со претходната година, има намалување.

„Бројот на деловни субјекти чии основачи се физички лица кои се државјани на Турција регистрирани во 2024 година е 2.875“, изјавија од Даночната управа за порталот „Банкар“.

Најчестите дејности во кои работат турските компании се трговија на големо, градежништво, угостителство, консултантски услуги и изнајмување или лизинг на автомобили.

„Општините во кои се регистрирани најмногу деловни субјекти чии основачи се турски државјани се Подгорица, Будва, Бар, Тиват, Котор“, наведува Даночната управа.

Бројот на турски компании што се избришани од Централниот регистар на деловни субјекти во последниот месец е 31, а од почетокот на 2025 година, 234.

Само во изминатиот месец се затворени 30 турски компании, или во просек по една дневно, што јасно укажува дека инцидентот на Забјело и воведувањето визи би можеле да имаат мерлив ефект врз пазарот. Со вкупно 234 затворени компании од почетокот на годината, очигледно е дека некои инвеститори го преиспитуваат својот понатамошен престој во Црна Гора.

Инаку, турски државјани претходно избодеа црногорски граѓанин, по што имаше протести во Подгорица. 

foto freepik.com