Грците на возраст над 60 години кои сè уште не се вакцинирани од денеска ќе добиваат парична казна од 100 евра секој месец доколку не ги добиле соодветните дози вакцини.

Релативно мал дел од луѓето во оваа возрасна група се очекува да бидат засегнати, бидејќи само 10 отсто од нив не се имунизирани или не закажуваат термин за вакцинација. Во апсолутни бројки, ова е околу 300 илјади луѓе.

Во исто време, владата ја аргументираше мерката со статистиката за смртност: девет од десет смртни случаи кај заразените со коронавирус се постари од 60 години. Седум од десет интубирани се во иста група и речиси сите се невакцинирани. Со тоа се врши притисок врз здравствениот систем, кој ја загрозува и грижата за тешко болните и оние кои боледуваат од други болести.

Атина не планира да прошири ваков тип мерки за вакцинацијата на други возрасни групи, иако Катимерини пренесе дека владата ја поддржува идејата да се вклучат и луѓето на возраст меѓу 50 и 59 години.

Сепак, земјата и понатаму е загрижена поради веќе еруптираниот бран на Омикрон. Вчера се пријавени 10.783 нови случаи (95 смртни случаи).