- Словачка ќе ги ограничи цените на енергетските производи за компаниите во првиот квартал од следната година, за да го ублажи растот на нивните сметки - изјави денеска премиерот на таа земја, Едуард Хегер, обидувајќи се да ги зголеми шансите на малцинската влада за донесување на буџетот за 2023 година.

Владата ќе го одреди плафонот за цената на струјата на 199 евра за мегават час, а за гасот 99 евра за мегават час, при што државата покрива 80 отсто од трошоците над тие нивоа на цени, рече Хегер на прес-конференција, пренесува Ројтерс.

- Ќе го покриеме речиси целиот компаниски сектор, останувајќи само компании со исклучително висока потрошувачка на енергија, кои ќе бидат поединечно третирани од Министерството за економија - додаде тој.

Хегер изјави и дека оваа помош е поврзана со „донесувањето на државниот буџет за 2023 година“, и затоа смета дека „вреди секој пратеник да ја соблече политичката кошула и да го одобри буџетот“.

Владата на Хегер стана малцинство во парламентот откако една партија, помалиот коалициски партнер, ја напушти владата во септември поради конфликт со министерот за финансии Игор Матовиќ, кој го предводи врвот на владејачката партија.

Владата на Словачка сега се соочува со тесно гласање за нејзиниот буџетски план за 2023 година, бидејќи опозицијата покренува бројни приговори и повикува на предвремени избори, што Хегер ги отфрла. Нацрт-буџетот за 2023 година предвидува вкупни мерки за поддршка во вредност од 3,5 милијарди евра, вклучително и ограничување на цената на електричната енергија за компаниите, што треба да чини околу 500 милиони евра во првиот квартал, изјави денеска Матовиќ.

Инаку, минатата недела лидерите на Европската Унија не успеаја да постигнат заеднички став за ограничување на цените на бензинот.