Четири неработни дена за Велигден, од Велики петок до Велигденски понеделник, годинава отвораат можност за кратко пролетно патување, но правилата за патување во Европа значително се менуваат токму во овој период.

Од 10 април земјите од Шенген го воведуваат новиот систем за влез и излез (EES), кој носи построги контроли на границите и нови процедури за патниците. Овој систем подразбира задолжително скенирање на документи, земање биометриски податоци како отпечатоци од прсти и фотографија, како и електронска евиденција на секое влегување и излегување од ЕУ.

Се очекуваат повремени гужви на најфреквентните копнени гранични премини во Европа, додека за дел од балканските рути, особено кон Грција и Бугарија, проценките се дека нема да има значително зголемување на метежот. Сепак, патниците се советуваат да не се потпираат на вообичаените рути, туку да ги следат камерите на граничните премини во реално време и да користат алтернативни премини за да избегнат долги чекања.

Грција и Црна Гора најбарани

Кога станува збор за летните планови, сликата веќе е прилично јасна. Забележливо е зголемено интересирање за одмор во Црна Гора и традиционално најбараната Грција. Од друга страна, дестинации како Кипар, Турција и Египет бележат пад на интересот кај туристите.

Колку чини велигденски „ескејп“: Цени од четврток до понеделник

Празничниот период кој започнува во четврток попладне и трае до понеделник навечер нуди реална можност за кратко патување, без разлика на буџетот.

За оние кои избираат автобуски превоз и пократки дестинации, постојат и попристапни опции. Темишвар е една од најевтините странски дестинации, каде аранжман со едно ноќевање може да се најде од околу 74 евра по лице.

Будимпешта, за две до три ноќевања, се движи меѓу 90 и 130 евра, во зависност од сезоната и категоријата на хотелот. Виена е нешто поскапа опција, каде две ноќевања со појадок ретко се под 160 евра, додека Прага за три ноќевања достигнува цена од 170 до 230 евра.

Овие цени се однесуваат на основни аранжмани што вклучуваат превоз и сместување, додека личните трошоци, влезници и факултативни излети се плаќаат дополнително.

Патување во странство со авион

За оние што избираат авионски превоз, цените се значително повисоки, но патувањето е побрзо и покомфорно. Аранжманите за европски дестинации за време на празниците се движат од околу 480 евра па нагоре, во зависност од локацијата и бројот на ноќевања.

Кога станува збор за авионскиот сообраќај, процедурите при поаѓање остануваат непроменети, но на аеродромите во земјите од Европската унија се препорачува патниците да пристигнуваат најмалку три часа пред лет, поради дополнителните контроли при враќање.

Европската комисија остави простор за флексибилност, што значи дека земјите членки може привремено да го суспендираат системот во случај на големи гужви, со цел да се забрза протокот на патници.

Паралелно со новите правила, расте интересот за кратки патувања во европски градови, но и за поблиски дестинации кои не бараат сложени гранични процедури. Токму ваквите опции стануваат се попривлечни за патниците кои сакаат да избегнат стрес и да го искористат празничниот викенд за одмор.

Цените за вакви кратки патувања варираат во зависност од дестинацијата и начинот на превоз. Поевтините опции со автобус и пократки релации почнуваат од околу 70 до 150 евра, додека авионските аранжмани за популарни европски дестинации достигнуваат и до 600–700 евра за неколку дена престој.

Оваа година Велигден носи комбинација од зголемен интерес за патување и нови правила кои може значително да го променат искуството на границите, па добрата подготовка и флексибилноста се клучни за избегнување на непотребни задржувања.