Најк ќе ги зголеми цените оваа есен - за да ги компензира дополнителните трошоци за царини во фискалната 2026 година, кои би можеле да достигнат и до 1 милијарда долари, им соопшти компанијата на инвеститорите во четврток.

Компанијата планира „прецизни зголемувања на цените“ за клиентите во Соединетите Држави, со постепено спроведување кое ќе започне на есен, изјави финансискиот директор Метју Френд. Тој не прецизираше кои производи ќе бидат засегнати или до кој степен.

Купувачите на опрема на Најк затоа ќе мора да платат повеќе за нивниот следен пар патики за трчање. Аналитичарите во BMO Capital веќе забележаа зголемување на цените од 5 до 10 долари на веб-страницата на Најк во мај.

Френд презентираше стратегија од четири дела за ублажување на трошоците за царини, вклучително и зголемувањето на цените, како дел од објавувањето на резултатите за четвртиот квартал од фискалната 2025 година. Планот, исто така, вклучува диверзификација на изворите на производство или прераспределба на производството низ различни земји.

„Најк“ моментално набавува 16% од увозот на обувки во САД од Кина, но планира да го намали тој удел на едноцифрена бројка до крајот на фискалната 2026 година.

Компанијата, исто така, планира да соработува со добавувачи и малопродажни партнери за да го ублажи влијанието на царините врз крајните клиенти. Френд рече дека мерките ќе бидат во сила во текот на целата 2026 година, а исто така објави дека „Најк“ ќе разгледа дополнителни внатрешни мерки за намалување на трошоците.

Приходите на „Најк“ се намалија за 10% на годишно ниво во фискалната 2025 година на околу 46 милијарди долари, но сепак ги надминаа скромните очекувања за продажба и профит на Волстрит во последниот квартал. Компанијата очекува падот на приходите да се ублажи со текот на времето, а најголемото влијание на царините ќе се почувствува во првата половина од фискалната 2026 година.

Извршниот директор Елиот Хил ја презеде компанијата пред околу осум месеци и оттогаш се обидува да го стабилизира бизнисот со намалување на промоциите, подобрување на односите со големите трговци на мало и враќање на фокусот на спортот.