Партиското седиште на ВМРО - ДПМНЕ ќе биде украсено со 50-тина големи уметнички слики со позлатени рамки на кои е прикажано раководството на партијата, објави денеска порталот НОВА.

На објавените фотографии се гледаат ликовите на претседателот Никола Груевски, неговата сопруга Боркица, екс -директорот на УБК Сашо Мијалков, собранискиот спикер Трајко Вељановски, а на повеќе слики ја има и и поранешната министерка Гордана Јанкуловска.

Мотивите на сликите се земани од повеќе масовни собири, прослави и митинзи на партијата како и моменти на кои се гледа и поранешниот партиски лидер, Љубчо Георгиевски и поранешната министерка за внатрешни работи, Доста Димовска.

На една слика е претставена коалицијата на ВМРО - ДПМНЕ и на Демократска алтернатива на Васил Тупурковски, а на друга ги има и досегашните генерални или извршни секретари на партијата.