Големата германска хемиска компанија „Домо“, со седиште во градот Лејна, поднесе барање за стечај кон крајот на декември, што предизвика загриженост кај околу 550 вработени, јавуваат германските медиуми.

Иако производите на компанијата сè уште се во голема побарувачка – полиамид 6, кој се користи во автомобилската индустрија, за производство на електрични ормари и во висококвалитетна облека за надворешна употреба – тоа не било доволно за да се компензираат вртоглавите трошоци за водење бизнис.

Главните причини за банкротот се:

-драстичното зголемување на цените на енергијата, што сериозно го оптоварило производството;

-проблемите во белгиската матична компанија, која исто така станала несолвентна и повеќе не можела да ги исполнува своите обврски кон доверителите.

Менаџментот сега се обидува да пронајде нов инвеститор кој би овозможил стабилизација на бизнисот и зачувување на што е можно повеќе работни места.

Министерот за економија на сојузната покраина Саксонија-Анхалт изјави дека покраината активно ќе ги поддржи сите учесници во процесот со цел да се спасат работните места и да ѝ се даде шанса на фабриката да продолжи со работа.

Одговорните истакнуваат дека банкротот не е последица на лошата позиција на фабриката во Лејна, туку на синџир проблеми што потекнуваат од матичната компанија во Белгија.

Судбината на стотици вработени сега зависи од тоа дали во наредните месеци ќе се појави стратешки партнер подготвен да го преземе бизнисот, пишува „Феникс“.