Пријатниот, избалансиран вкус на бразилската арабика, најценетото кафе во светот, би можел да се промени во наредните години.

Бидејќи климатските промени сè повеќе влијаат на традиционалните региони за одгледување на оваа сорта, земјоделците во најголемата земја производител во светот сè повеќе се свртуваат кон робуста, поотпорен, но горчлив вид кафе што носи посигурно производство. Сушите што го погодија Бразил во последните години го отежнаа особено одгледувањето на арабика, сорта која не може да толерира високи температури и недостаток на врнежи од дожд. Затоа производството на робуста е во пораст, што е потврдено и со најновиот извештај на Министерството за земјоделство на САД. Додека производството на арабика растеше за околу два до два и пол проценти годишно во претходните три години, робуста забележа речиси двојно побрз раст, околу 4,8 проценти.

Иако Виетнам во моментов е најголемиот светски производител на робуста, аналитичарите на Rabobanka веруваат дека Бразил би можел да го престигне благодарение на разгранетиот синџир на снабдување и зголемениот број земјоделци што преминуваат на поотпорни сорти.

Арабиката, сепак, останува симбол на квалитет, дава посложени ароми и често е носител на ароматични ноти во мешавините. Робуста, од друга страна, носи јачина, повеќе кофеин и погуст крем, поради што во пракса комбинација од овие два вида најчесто се користи во еспресото.

Климатските прогнози, сепак, не се охрабрувачки. Според студијата цитирана од Ројтерс, повеќе од 75 проценти од областите со најдобар квалитет во Бразил би можеле да станат несоодветни за одгледување арабика до 2050 година. Ова би довело до големи нарушувања во глобалната понуда, зголемување на цените и ризик од банкрот на малите производители кои не можат да издржат години ниски приноси, пренесува bizportal.rs.

foto freepik.com/fxquadro