Претседателот на САД, Доналд Трамп, и министерот за трговија на САД, Хауард Латник, објавија дека спроведувањето на новите царини е одложено до 1 август, објавува денес „Гардијан“.

Трамп изјави дека неговата администрација планира денес да почне да испраќа писма до трговските партнери на САД со кои ќе ги потврди новите царини.

„Може да бидат 12, можеби 15 писма. Веќе постигнавме некои договори“, им рече Трамп на новинарите.

Со оглед на тоа што претходно најавената 90-дневна пауза за царините требаше да заврши на 9 јули, претседателот беше прашан дали новите стапки ќе стапат на сила оваа недела или на 1 август, како што предложија некои функционери.

„Мислам дека ќе завршиме со повеќето земји до 9 јули, да. Или со писмо или со договор“, рече Трамп, но не беше доволно јасен во својата изјава, според „Гардијан“.

Сакајќи да избегне забуна, министерот за трговија на САД, Хауард Латник, се вклучи, додавајќи: „Царините стапуваат на сила на 1 август, но претседателот во моментов ги одредува стапките и договорите“.

Во април, Трамп објави основна царина од 10 проценти за повеќето земји и дополнителни царини до 50 проценти.

Подоцна ги одложи новите царини до 9 јули за сите освен за оние земји кои беа утврдени на 10 проценти.

Новиот датум, 1 август, им дава на земјите дополнително одложување од три недели, но исто така ги принудува увозниците во продолжен период на неизвесност околу спроведувањето на царините.