Кина откри „значајни нови наоѓалишта“ на ретки земни минерали, вклучувајќи флуорит и барит, во покраината Сечуан, соопшти Министерството за природни ресурси.

Значајни нови наоѓалишта на ретки земни минерали се потврдени во рударската област Маониупинг во округот Мианинг, според подружница на China Rare Earth Group.

Се проценува дека новооткриените минерали тежат 9,666 милиони тони, при што количината е изразена во форма на оксиди, што е стандарден начин за мерење на ваквите минерали во рударската индустрија.

Експертите истакнуваат дека откритието претставува важен придонес кон стратешките резерви на ретки минерали на Кина, но е и пример за успешно истражување на длабоки и маргинални наоѓалишта во геолошки сложени области.

Покрај ретките минерали, на истата локација беа потврдени големи наоѓалишта на флуорит и барит, проценети на 27,135 милиони и 37,228 милиони тони, што ги става во категоријата на екстремно големи наоѓалишта.

Ретките минерали се „витамини на индустријата, а флуоритот и баритот се нејзини главни столбови“, изјави новинската агенција Ксинхуа, цитирајќи го Ванг Денгхунг, директор на Институтот за минерални ресурси на Кинеската академија за геолошки науки.

Флуоритот е клучна суровина во голем број сектори, вклучувајќи ја воздухопловната, фармацевтската и електронската индустрија, инженерството и нуклеарната енергија, забележува Ксинхуа.

Баритот главно се користи во дупчењето за нафта и гас, но е важен и за хемиската индустрија, како и за хемикалии, полнење хартија и дијагностичко снимање во медицината.

foto Wikipedia/ Ivar Leidus