Русија користи логистичка операција во Берлин за да ги заобиколи санкциите на Европската Унија, пренасочувајќи забранети стоки кон Москва преку поштенски систем кој користи послаби контроли за меѓународни пратки, покажа истрага на германски медиуми.

Тест пратки опремени со GPS предаватели, кои содржеа стока опфатена со санкциите, поминаа низ логистичка сала во близина на аеродромот Берлин Бранденбург без пречки, пред да бидат испратени во Москва преку Полска и Белорусија, според истрагата.

Операцијата наводно користи етикети за испорака од државната поштенска служба на Узбекистан, иако Германската федерална агенција за мрежи не дозволува поштенската служба да работи во Германија.

Меѓународните поштенски пратки се предмет на полесни контроли од редовниот извоз на стоки, бидејќи поштенскиот сообраќај се обработува брзо и во големи количини, во согласност со поедноставените царински и извозни процедури.

Системот наводно го води поранешниот директор на RusPost GmbH, германската филијала на руската државна пошта „Пошта на Русија“, кој е идентификуван како Дмитриј В. Во август 2024 година, царинските власти ги претресоа канцелариите на таа компанија во Берлин под сомнение за кршење на економските санкции против Русија, но последователната истрага не даде резултати, пренесува Б92.

Пратеникот на Украина за политиката на санкции, Владислав Власиук, изјави за „Еуроњуз“ дека не е изненаден од откритијата.

„Никој не прави доволно ако се погледне бројот на случаи“, рече Власиук, одговарајќи на прашањето дали Германија прави доволно за да спречи вакви неуспеси во системот.

Тој додаде дека Украина редовно собира информации за ваквите практики и ги споделува со меѓународните партнери, како и дека има добро познати механизми дизајнирани да ги заобиколат западните санкции.

Власиук моментално е на турнеја низ неколку европски земји, вклучувајќи ги Холандија и Белгија, за да се залага за построго спроведување на санкциите.

foto RIA Novosti