Бебето кое вчера беше оставено на хауба од автомобил во центарот на Скопје, со видливи повреди на неговото тело, ќе живее во Домот за деца без родители во Битола, а на таткото и мајката најверојатно ќе им биде одземено родителското право. Малата Мевљан закрепнува на Детската клиника и е во добра здравствена состојба. Полицијата денеска ги пронајде нејзините родители и утврди дека таткото во алкохолизирана состојба го грабнал девојчето, откако мајката не сакала да дозволи да излезе и да проси со 7-месечното бебе. Тој потоа го фрлил детето на хаубата од автомобилот и заминал. Мајката во полиција пријавила дури 12 часа откако детето и било одземено. Од Министерството за труд и социјална политика информираат дека постапката за одземање на родителското право ќе започне веднаш. Таткото И.Р. доби и три кривични пријави за запуштање малолетно лице, тешка телесна повреда при вршење семејно насилство и загрозување на сигурност.