Европската унија нема да воведува санкции за рускиот гас или нафта, објави денеска унгарскиот премиер Виктор Орбан во видео објавено на неговиот Фејсбук профил, пренесува Ројтерс.

„Најважното прашање за нас е решено на поволен начин - нема да има санкции поврзани со гас или нафта, така што снабдувањето со енергија на Унгарија во наредниот период е безбедно“, рече Орбан во видео пораката од самитот на ЕУ во Франција. 

Г7 ги повикува земјите производители на нафта и гас да го зголемат снабдувањето

Руската инвазија на Украина има силни последици на меѓународниот енергетски пазар, особено предизвикувајќи голем пораст на цените на нафтата, гасот и јагленот, се вели во заедничката декларација на министрите за енергетика на Г7, објавена по вонредниот виртуелен состанок за Украина.

„Со загриженост го забележуваме товарот што ова го претставува за домаќинствата, особено оние со ниски приходи, како и за компаниите и индустријата, особено во европските земји“, порачаа министрите на САД, Германија, Велика Британија, Франција, Италија, Јапонија и Канада.

Наведоа и дека порастот на цените уште потешко ќе се почувствува во земјите во развој кои се нето увозници на гориво и чии финансиски средства се исцрпени.

Светскиот пазар е нарушен од почетокот на руската инвазија на Украина на 24 февруари, а цените на гасот и нафтата, од кои Русија е главен снабдувач, нагло скокаат.

Министрите се согласија да преземат конкретни мерки доколку е потребно, особено во соработка со Индонезија, која е актуелен претседавач со Г-20, се вели во соопштението. Овогодинешниот претседавач на Г7 е Германија.

Треба да се предвидат ефикасни мерки за да се запре поскапувањето на бензинот“, велат тие.

„Ги повикуваме земјите-производители на нафта и гас да се однесуваат одговорно и да го испитаат нивниот капацитет за зголемување на снабдувањето на меѓународните пазари, особено кога производството не го достигнало целиот капацитет“, побараа министрите од Г7.

Тие посочија дека во тоа клучна улога има Организацијата на земјите извознички на нафта (ОПЕК), иако досега одбиваше да го зголеми производството.