Орав си заминува, кои се кандидатите кои ќе го заменат?
Европската унија денеска потврди дека мандатот на Аиво Орав како шеф на делегацијата на ЕУ во Република Македонија завршува и дека на лето ќе биде именуван нов амбасадор што ќе го претставува Брисел во македонската држава, јави дописникот на МИА од Брисел.
Маја Коцијанчиќ, портпаролка на Европската комисија и на Европската служба за надворешни работи (ЕЕАС), во изјава за МИА потврди дека процесот на селекција на следниот шеф на ЕУ-делегацијата во Скопје е во тек и се одвива во рамки на ЕЕАС на Федерика Могерини. Иако Коцијанчиќ не сакаше да открие, според информациите на МИА од високи извори во Еврокомисијата, искусниот словенечки дипломат Самуел Жбогар е најсериозен кандидат да го наследи Орав, а заедно со него во финалната селекција на европската дипломатска служба за ЕУ-амбасадор во Македонија е и актуелниот британски амбасадор во Скопје, Чарлс Гарет.
„Функцијата на шеф на делегацијата на БЈР Македонија е дел од редовната ротација оваа година. Процесот на селекција за следниот шеф на делегацијата е во тек и како што е секогаш практиката, името ќе биде објавено кога постапката за избор ќе биде завршена“ - рече Коцијанчиќ.
Словенецот Жбогар е пред промоција во нов амбасадор на Унијата во Република Македонија, велат високите извори од Брисел за МИА, инсистирајќи на анонимност. Единствен кој, наводно е влезен во последната селекција со Жбогар е актуелниот амбасадор на Велика Британија во Македонија, Чарлс Гарет, но неговите шанси се наводно помали во однос на поранешниот министер за надворешни работи на Словенија.
Во 22-годишната кариера како дипломат, Жбогар е вклучен во сите поголеми политички проекти на словенечката надворешна политика.
Слично
Поврзани вести
