Шефот на делегацијата на ЕУ, Аиво Орав денеска на трибина за спречување на корупција изјави дека Македонија во моментов се соочува со сериозна политичка криза, но и криза во однос на владеењето на правото.

„За Европската унија справувањето со корупцијата, демократските принципи и владеењето на правото и човековите права е основа на процесот за проширување на Унијата“- кажа Орав.

Тој додава дека зголемените напори за борба против корупцијата на централно и на локално ниво се клучни за напредокот на земјата.  Орав вели дека одлуката на Иванов за аболиција ги поткопа овие напори. Категоричен е дека сите државни институции треба да му помогнат на Специјалното јавно обвинителство да ја врши својата работа. За институциите Орав вели дека треба да им служат на сите граѓани, а не на неколку луѓе.