Претставници од сите општини од Скопскиот плански регион беа дел од  денешната обука за стратешко планирање на општините. Првата обука ја отвори заменик министерот за локална самоуправа Сашо Лазаревски. - Стратешкото планирање е корисен инструмент кој овозможува јасно дефинирање на приоритетите и целите, утврдување на значајни прашања кои се во интерес на граѓаните, како и утврдување на соодветни активности кои ќе ги решат тие прашања со искористување на што помал број буџетски средства, појасни Лазаревски. Со изработката на овој документ, додаде тој, се исполнува и едно од барањата на Европската комисија во насока на зајакнување на квалитетот на стратешкото планирање во централните и локалните институции. - Дополнително Владата ќе има унифицирани стратешки планови за сите општини и секако подетален увид врз активностите кои ги спроведуваат општините и средствата кои се трошат за таа намена. На овој начин сериозно ќе се подобри системот на транспарентност и отчетност во нашите општини што претставува чекор напред, смета Лазаревски.