Аеродром ќе им обезбеди училишна облека на учениците во осумте основни училишта во оваа скопска општина. Тендерот за набавка на униформите, кои од септември ќе бидат задолжителни, е објавен. Ќе бидат набавени вкупно 5.700 комплети облека за кои општината ќе потроши околу 7 милиони денари. Униформата ќе се состои од сиви панталони, бели памучни блузи и тегет елеци со амблем на кој ќе биде извезено логото на Општина Аеродром и името на училиштето. Девојчињата ќе избираат здолниште или панталони, а ќе имаат можност да ги имаат и двете, со доплата за второто. „Целта е децата да бидат еднакви меѓу себе, да не се разликуваат по начинот на облекување. Има деца чии родители може да им овозможат поскапа гардероба, но и некои кои немаат како нивните врсници. Кај нив се раѓаат лоши чувства и сакаме тоа да го спречиме. Барем додека одат на училиште да бидат еднакви, а да се разликуваат по тоа кој колку учи и колкаво знаење има. Очекувам дека родителите и учениците ќе бидат задоволни. Планот ни е секоја година потоа општината да обезбедува училишна облека за сите деца“, рече градоначалникот Ивица Коневски. Министерот за образование и наука Спиро Ристовски денеска ја посети општината и ги виде примероците на униформите. Очекува дека примерот ќе го следат и другите општини и ќе воведат кодекс на облекување, кој Министерството не може да им го наметне. Смета дека на тој начин ќе ги достигнат стандардите на училиштата од европските метрополи.