Иако не се ниту близу до договор , лидерите на политичките партии за утре подготвуваат нова средба заедно со амбасадорите Орав и Бејли.

Засега состојбата е неизвесна дали лидерите ќе успеат да ги доближат ставовите кои од петни жили ги бранеа на досегашните средби.

Последната лидерска средба од 29 јуни заврши без никаков чекор напред и знаци за оптимизам, како и што се очекуваше, а после нејзиното завршување ниту еден од македонските политички лидери не сакаше да зборува со новинарите.

Она што дава барем малку надеж во преговорите на четирите политички партии е желбата за повторна средба.

На последната средба не присуствуваше ниту еврокомесарот Хан а пораката од Брисел е дека Хан ќе дојде само ако постои шанса за договор.

Како што Фактор ексклузивно објави, Викторија Нуланд доаѓа во Скопје. Посетата е закажана за 13 ти јули.

Иако не се знае точно што ќе се случи дотогаш со политичката криза, јасно е дека, ако нема решение, таа ќе изврши дополнителен притисок врз политичките актери.

Како времето ќе минува  така притисокот  врз премиерот  и лидер на ВМРО ДПНЕ  Никола Груевски и претседателот на СДСМ Зоран Заев  ќе се зголемува, а ќе кулминира  во текот на јули кога се очекува  во Скопје да допатува  американскиот помошник  државен секретар за Европа и Евроазија Викторија Нуланд, напиша Фактор.

По една година, помошничката-државен секретар во американскиот Стејт Департмент задолжена за Европа и Евроазија, повторно е во Македонија. Нејзината посета е дел од планираната посета на регионот, при што ќе бидат посетени и други земји.