Опозициските пратеници денеска побараа надзорна расправа до Комисијата за земјоделство, шумарство и водостопанство. Брањето се однесува на утврдување како што велат на пропустите кои институциите и органите на власта ги направиле во делот на заштита од поплави и со тоа предизвикале огромни штети врз населението. Од СДСМ денеска упатија критики на адреса на власта и институциите, обвинувајќи дека ниту една институција после 17 дена од поплавата не ги известила граѓаните кои се причините за настанувањето на поплавата и зошто не беа спречени огромните штети по животитe и имотот на населението. „Граѓаните многу   многу добро знаат дека институциите се најодговорни за ужасот од поплавата. Знаат дека одговорностите лежат во Владата на Република Македонија, Министерствата за земјоделство, шумарство и водостопанство, Транспорт и врски, Внатрешни работи, Животна средина и просторно планирање, но и во јавниот медиумски сервис“, изјави Панче Орцев, пратеник и претседател на собраниската комисија за земјоделство, шумарство и водостопанство од СДСМ. Тој потенцираше дека овие институции работеле спротивно на  законите во областа на хидрометеорологија и заштита од поплави и со тоа донесоа хаос во животите на населението. Орцев ги повика членовите на Комисијата, да го прифатат барањето за Надзорна расправа за пропустите и одговорностите при справувањето со поплавите и со тоа да застанат во одбрана на граѓаните и законите.