Секој понеделник првиот час во училиштата во скопската општина Аеродром започнува со интонирање на македонската химна. Од општината појаснуваат дека церемонијата е воведена во сите осум основни училишта на нивна територија со цел кај учениците да се развијат патриотски чуства, како и да се влее чуство на почит кон државните симболи. Родителите немаат ништо против - велат дека е добро нивните деца од мали нозе да ја научат химната. Сепак, народниот правобранител Иџет Мемети најавува дека ќе испита дали интонирањето на химната за старт на наставата е законски и каква корист од тоа имаат учениците. Сите основци, освен првачињата, во Аеродром секој понеделник во 7:20 часот стојат во строј по двајца додека се интонира химната и на училишниот јарбол се подига македонското знаме. Дури потоа започнува наставата.