Од полноќ во Словенија стапија на сила нови мерки за ограничување на точењето гориво, со цел справување со проблемите во снабдувањето со нафтени деривати.

Според одлуката на владата, на бензинските пумпи може да се точат најмногу 50 литри по лице дневно, додека за правни лица и лица кои вршат стопанска дејност, вклучително и земјоделство, лимитот изнесува 200 литри.

Ограничувањата ќе важат до понатамошно известување.

Вклучена и армијата

Владата донесе одлука да ја активира и словенечката армија, која ќе учествува во логистиката и транспортот на гориво. Војската ќе помогне во дистрибуцијата со цел побрзо снабдување на бензинските пумпи.

Дополнително, од дистрибутерите е побарано да ја координираат испораката од складиштата до пумпите за да се избегнат застои.

Дневни извештаи и можни нови мерки

Трговците со гориво ќе имаат обврска секое утро да доставуваат извештаи до владата за состојбата на бензинските пумпи. Врз основа на тие податоци, ќе се одлучува дали се потребни дополнителни мерки.

Премиерот Роберт Голоб најави дека се разгледуваат и ограничувања за странски државјани, со цел да се заштитат домашните резерви.

Критики и реакции

Според владата, најголем дел од проблемите се поврзани со компанијата Petrol, кон која премиерот упати критики. Од компанијата, пак, тврдат дека вложуваат максимални напори за да обезбедат стабилно снабдување на својата мрежа.

Мерките доаѓаат во време на зголемени притисоци врз енергетските пазари и можни нарушувања во снабдувањето со гориво во регионот.