Алекс Панајоту е експерт која е препознатлива по тоа што го развила нејзиниот концепт наречен The Endurance Mindset® (слоб. превод: Менталитет на издржливост), кој е насочен кон одржливо лидерство под притисок.

„Некои луѓе природно можеби полесно поднесуваат стрес, но одржливата отпорност мора стратешки и доследно да се развива со текот на времето. Таа не се случува случајно. На високи позиции, проблемот ретко е интелигенцијата или способноста. Проблемот е одржливоста“ – вели за Женски Магазин, Алекс Панајоту, експертот кој со нетрпение го очекуваме следната недела во Скопје да одржи предавање на тема „Лидерска издржливост и високи перформанси“.

Алекс Панајоту е експерт која е препознатлива по тоа што го развила нејзиниот концепт наречен The Endurance Mindset® (слоб. превод: Менталитет на издржливост), кој е насочен кон одржливо лидерство под притисок.

Таа на 12-ти Март годинава ќе одржи отворено предавање во кое со својата препознатлива харизма ќе зборува за сопствените концепти, за издржливоста, истрајноста, добросостојбата, но и заштитата од „прегорување.“

Настан за кој во моментов се бара „билет повеќе“, затоа што лицата кои што се на лидерски позиции, ќе имаат можност на ова предавање да слушнат повеќе за Менталитетот на издржливост од жената која е една од ретките што истрчала маратон во должина од 400 km, успеала да наттрча коњ, а и да се избори со ракот, потпирајќи се само на својот веќе добро развиен концепт за издржливост.

Настанот се одржува во организација на Едукативниот центар M6 во Скопје, а заради големиот интерес, предавањата ќе се одржат во просториите на Филхармонија на Република Македонија.

Сите заинтересирани може да набават билети за предавањето на следниот ЛИНК.

Во пресрет на предавањето во Скопје, Алекс даде кратко интервју за Женски Магазин во кое накратко ги опфативме некои од клучните работи за кои таа ќе зборува на предавањето, а истовремено ви нуди можност и одблиску да се запознаете со неа.

Проследете го во продолжение интервјуто во целост:

ЖМ: Дали ова е ваше прво предавање пред публика во Скопје? Какви се вашите очекувања и што може да очекуваат учесниците?

Имав задоволство да зборувам во Скопје минатата есен на настанот на M6 посветен на среќата. Тоа беше прекрасно искуство и навистина уживав во интеракцијата и дискусиите со учесниците. Нивото на ангажираност и отвореност во салата остави силен впечаток кај мене.

Претходно сум работела и во Скопје, така што враќањето не ми е ново, туку познато.

Овој престоен настан е сосема поинаков по фокусот.

„Leadership Resilience & High Performance“ е стратешки, продлабочен мастер-клас наменет за лидери кои работат под долготраен притисок.

Тој оди подалеку од инспирација.

Анализира како се менува лидерското однесување кога влоговитесе високи, како текот на времето влијае врз енергијата и расудувањето и како перформансите може да се одржат без долгорочнипоследици.

Учесниците може да очекуваат фокусиран и интерактивен ден со практични рамки, структурирана рефлексија и алатки што веднаш ќе можат да ги применат.

Станува збор за градење лидерство што останува јасно, стабилно и ефективно — особено кога притисокот се зголемува.

ЖМ: Што претставува концептот Endurance Mindset® и колку вашето искуство како екстремен спортист влијаеше врз неговото создавање?

Endurance Mindset® е лидерска рамка за одржливи високи перформанси под притисок.

Таа е развиена преку моето долгогодишно искуство како екстремен спортист во дисциплини на издржливост.

За време на тие предизвици — некои траеја со недели и илјадници километри — морав да разберам како носам одлуки, како го регулирам стравот, како управувам со енергијата и како останувам фокусирана во услови на неизвесност.

Менталитетот се обликуваше низ практика, преку лично искуство.

Подоцна, кога почнав да анализирам како сум ги постигнала тие резултати — и кога сè почесто бев поканувана да предавам и да зборувам за тоа — мојата академска позадина во психологија, социологија и филозофија стана клучна.

Таа ми овозможи да го структурирам и продлабочам она што претходно го чувствував интуитивно.

Работата со менаџери кои се наоѓаат на сениорски позиции во изминатите шеснаесет години дополнително го усоврши концептот.

Сфатив дека истите внатрешни модели што одредуваат дали еден спортист ќе продолжи или ќе се откаже, влијаат и врз тоа како лидерите функционираат во сложени средини со голема одговорност.

Теренот се менува.

Човечката психологија не.

Endurance Mindset ја претвора таа интеграција на лично искуство, академско знаење и извршна практика во конкретни лидерски алатки што ја зајакнуваат јасноста, расудувањето и долгорочната одржливост.

ЖМ: Дали менталната издржливост е нешто со кое се раѓаме или се гради со текот на времето?

Менталната издржливост — а со тоа и отпорноста — се гради.

Некои луѓе природно можеби полесно поднесуваат стрес, но одржливата отпорност мора стратешки и доследно да се развива со текот на времето.

Таа не се случува случајно.

На високи позиции, проблемот ретко е интелигенцијата или способноста. Проблемот е одржливоста.

Отпорноста не значи апсорбирање неограничен притисок. Таа значи интелигентно регулирање на притисокот — знаење кога да се притисне, кога да се одмори и кога да се направи корекција.

Тоа е способност што секој може да ја зајакне ако пристапи свесно.

ЖМ: Постои ли разлика меѓу физичката и емоционалната издржливост? И како лидерите можат да ја зголемат отпорноста во своите тимови?

Постои разлика, но тие се длабоко поврзани.

Физичката издржливост се однесува на капацитет.

Емоционалната издржливост се однесува на регулација, перспектива и расудување.

Лидер може надворешно да изгледа силно, но ако е емоционално преоптоварен или физички исцрпен, неговото однесување се менува — понекогаш суптилно. Може да се појават прекумерна контрола, колебливост или реактивност.

Лидерите што сакаат отпорни тимови, прво мора свесно да се стабилизираат себеси.

Отпорните култури се градат преку:

Јасни очекувања

Конзистентна комуникација

Психолошка сигурност

Реалистично управување со енергијата

Притисокот сам по себе не ги оштетува тимовите. Нејасноста и неконзистентноста го прават тоа.

ЖМ:Може ли да издвоите неколку навики што ги издвојуваат успешните луѓе од просечните?

На високо ниво, разликата ретко е во талентот.

Таа е во дисциплината на однесување.

Лидерите со високи перформанси:

Паузираат пред да реагираат и размислуваат за посакуваниот исход

Редовно рефлектираат

Го штитат одморот исто толку свесно како и перформансот

Преземаат одговорност наместо да обвинуваат

Го поддржуваат тимот за да создадат нови лидери

Се подготвуваат за препреки

Тие функционираат свесно.

Не ја препуштаат изведбата на случајност.

ЖМ:Јавно зборувате за сопствените здравствени предизвици со кои сте се соочиле во животот? Дали тие ве променија, или, пак ве натераа уште повеќе да почнете да го применувате концептот на издржливост? Дали болката, сама по себе, може да претставува извор на сила?

Да, ме променија — но не на начинот на кој повеќето луѓе претпоставуваат.

Повеќето мислат дека мојата трансформација започна со болеста. Во реалноста, јас веќе имав изградено основа и алатки за справување со тешкотии.

Но, овој предизвик ги тестираше тие темели на поинакво ниво.

Болеста ги отстранува илузиите.

Го разјаснува она што навистина е важно.

Болката сама по себе не создава сила.

Но, свесното соочување со тешкотиите ја продлабочува перспективата и фокусот.

За мене, тоа ја потврди една суштинска вистина: одржливата сила е поважна од херојските изблици.

ЖМ: Освен за издржливоста, зборувате и заштитата од „прегореност“... Сметате ли дека денешните жени често повеќе страдаат од „прегореност“ како мајки и сопруги, или пак како вработени жени и лидери?

Прегорувањето е физички и/или ментален колапс предизвикан од долготраен стрес.

Кај многу жени ризикот не доаѓа од една улога, туку од комбинацијата — професионални обврски, лидерски очекувања, семејни одговорности и емоционален товар — без реална рамнотежа.

Проблемот не е амбицијата. Проблемот е недостатокот од јасност, граници и свесно управување со енергијата.

Во овој мастер-клас ќе ја допреме оваа тема многу пошироко, затоа што одржливото лидерство бара реалистичен баланс. Без него, дури и високите перформанси на крајот си земаат данок.

ЖМ: Што би ѝ порачале на жената која се чувствува уморно, заглавено или без мотивација?

Прво — нема ништо погрешно со вас.

Заморот е информација.

Запрашајте се искрено:

Дали сопствената благосостојба ја ставам на последно место?

Што ме исцрпува?

Што ме полни со енергија?

Каде сум ги игнорирала сопствените сигнали?

Не ви треба драматична трансформација.

Ви треба една јасна, искрена одлука.

Импулсот се враќа преку јасност, не преку сила.

ЖМ: Кое е мотото што вас ве води во животот?

„Промени се пред промената да те пронајде.“

И секогаш дај го најдоброто од себе — со приземјен позитивен став.

За мене, извонредноста не е перфекција. Таа е доследно давање максимум со стабилност и реализам.

ЖМ: Трчате маратони, сте успеале да наттрчате и коњ. Сте го победиле ракот. Привлекувате огромно внимание со вашите предавања и им го менувате животот на илјадници луѓе што ги следеле вашите предавања. Постои ли нешто што не можете да го направите и што е тоа?

Постојат многу нешта што не можам да ги контролирам.

Не можам да одлучам сè што ќе ми се случи во животот.

Не можам да го контролирам однесувањето на другите.

Не можам да ја елиминирам неизвесноста или да го гарантирам исходот.

Но, можам да ја контролирам подготовката.

Можам да го контролирам одговорот.

Можам да ја контролирам посветеноста.

А има и нешта што едноставно избирам да не ги правам.

На пример, немам желба да скокнам со падобран — иако знам дека би можела. Всушност во 2004 година пробав банџи скок, само за да се тестирам себе си.

Не станува збор за тоа што е можно.

Станува збор за тоа на што свесно избираме да се посветиме — и како живееме со таа посветеност.

Погледнете го и подкастот „Чекор напред со М6“ во кој гостуваше Алекс:

Доколку ова интервју ве заинтригира и сакате повеќе да научите за време на мастер класот, не губете време, нарачајте билет веднаш на следниот ЛИНК.

Фото: Приватна архива