Платите на администрацијата ќе се зголемат од септември годинава, најави премиерот Никола Груевски, во обраќањето пред синдикалните претставници во Домот на АРМ. Според Груевски, овој септември платите на административците ќе бидат повисоки за пет проценти, а целта е да се овозможи подобрување на стандардот на вработените во јавниот сектор. „Во 2007 се изврши зголемување на платите на оваа категорија на вработени – вработените во јавниот сектор за 10 проценти, а во 2008 уште еднаш за 10 проценти. Tаков чекор претходно се немаше случено во Македонија, а особено е значаен фактот што истото не беше направено под притисок на штрајкови или демонстрации“, рече Груевски.

Тој додаде дека со новите економски политики, со намалувањето на даноците и со временото зајакнување на даночната дисциплина, Владата успеала со пониски даноци да прибере повеќе пари во буџетот од претходно, а со тоа се создале услови за зголемувањето.

Покачувањето на платата за административците досега неколкупати се одлагаше, а последен пат на почетокот на декември Собранието го изгласа Законот за изменување на Законот за исплата на платите, по скратена постапка, со кој, наместо во декември 2013-та, зголемувањето на платите на вработените во јавниот сектор за 5 проценти се одложи за октомври 2014-та година.

Според Груевски, причина за одлагањето е економската криза. „Следуваа тешки економски години во светот и во Европа, со намалување на платите во јавниот сектор и со масовно отпуштање во јавниот сектор во голем број земји, но во Македонија тоа не се случи“, рече премиерот дека земјава ја задржала стабилноста како многу малку земји во тој период низ светот.