Очекуваат Косово да го предадеме на тацна, вели српскиот претседател Александар Вучиќ.

Вели дека очекуваат дека Србија се помирила и дека во 1999 година била бомбардирана со право.

„Откако рековме дека нема да се откажеме од меѓународните повелби, Уставот на Србија и територијалниот интегритет, тогаш тие почнаа да прават проблеми“, рече Вучиќ. 

Тој изјави дека Србија настојува да си ги зачува „државата, името и презимето“, но дека се „плаши“ дека ќе мора да бидат уште посилни и поцврсти на тој план, пренесе Бета.

„Правете што сакате и надворешно и внатрешно, но нема да добиете независно Косово како што се надевате. Ќе треба да поставите други“, рече Вучиќ.

Вучиќ зборуваше и за најавата на Србите од Косово кои и дадоа рок до 1 јуни на Приштина „да престане со провокациите“ и додаде дека е загрижен поради тоа.

На Косово денеска стапија на функција новите градоначалници во српските општини Северна Митровица, Звечан, Лепосавиќ и Зубин Поток.  Тие се од редовите на албанската заедница.

Избрани се на локалните избори на 23 април кои ги бојкотираа Србите. Положија заклетва, а  знамето на Косово е истакнато  на општинската зграда во Северна Митровица.  

Директорот на канцеларијата за Косово, Петар Петковиќ вели дека почна „окупацијата“ на северот на Косово. 

Фото: Александар Вучиќ/принтскрин