Осуда на одлуката на Кривичниот суд во Cкопје за продолжување на притворот на новинарот Томислав Кежаровски, пристигна од ОБCЕ. Претставничката на ОБСЕ за слобода на медиумите, Дуња Мијатовиќ, посочи дека е неприфатливо новинар да биде притворен поради новинарско известување. - Јас веќе интервенирав за овој случај два пати минатиот месец. Денес сум особено вознемирена што судот одлучи да го продолжи притворот за нови триесет денови  - рече Мијатовиќ. Таа ги повика властите да ги послушаат апелите на граѓанското општество, но истовремено апелираше и до Кежаровски да го прекине штрајкот со глад кој го започна во понеделникот. - Уште еднаш ја нагласувам важноста да им се овозможи на новинарите да прават истражувачки стории за прашања од јавен интерес, ослободени од заканата од затвор и без да бидат принудени да ги откријат своите извори. Апелирам до властите во Скопје да се разгледа ова прашање како итно и сериозно. Продолжувањето на притворот за Кежаровски веќе има големо влијание врз слободата на медиумите во земјата - заклучи Мијатовиќ.