Бројот на земји кои Foreign, Commonwealth & Development Office (FCDO) ги смета за премногу опасни за патување значително се зголемил во последните седум години, покажуваат најновите податоци.

Од 2019 година досега, бројот на ризични дестинации е зголемен за 12, а моментално на „црвената листа“ се наоѓаат 76 земји или територии од вкупно 226, за кои се советува целосно избегнување на патувања поради сериозни безбедносни, здравствени или правни ризици.

Од нив, 14 земји се целосно означени како високоризични, што значи дека не се препорачува патување во ниту еден дел од нивната територија. За дополнителни 38 земји постојат региони што треба да се избегнуваат, додека за 24 се препорачува патување само во исклучителни случаи.

Меѓу најопасните земји во светот, според најновите предупредувања, се:

• Авганистан – екстремно висок ризик од тероризам, политичка нестабилност и можност за долготрајно притворање
• Хаити – сериозен криминал, вооружени грабежи, киднапирања и насилни протести
• Буркина Фасо, Мали и Нигер – висок ризик од терористички напади и киднапирања
• Иран – сериозни безбедносни ризици поради геополитички тензии и можни апсења
• Русија – ризик од терористички напади и последици од војната во Украина
• Сирија, Јемен, Ирак и Палестина – високо ниво на тероризам, киднапирања и вооружени конфликти
• Белорусија – ризик од апсење поради политички активности
• Јужен Судан – вооружено насилство и небезбедни контролни пунктови

Покрај терористичките напади, главните ризици во овие земји вклучуваат вооружени грабежи, киднапирања, силувања, насилен криминал и политичка нестабилност. Во одредени држави, како Хаити и Јужен Судан, криминалните банди претставуваат секојдневна закана, додека во други, како Сирија и Јемен, активни се терористички организации како Ал Каеда и ИСИС.

Експертите предупредуваат дека глобалната безбедносна ситуација се влошува, а дел од некогаш популарните туристички дестинации веќе не се сигурни за посета.

• Сè повеќе авантуристички туристи сепак патуваат во вакви земји благодарение на информации во реално време и социјалните мрежи – вели Џејмс Вилкокс, основач на туристичката агенција Untamed Borders.

Сепак, најголемиот дел од британските граѓани се придржуваат до официјалните препораки на FCDO и ги избегнуваат високоризичните дестинации.