Директорот Торбјорн Торнквист нагласи дека продажбата на средствата на Лукоил ги опфаќа сите клучни аспекти и дека западните регулатори немаат причина да се грижат, додека САД сè уште размислуваат да ја одобрат трансакцијата.

Извршниот директор на групацијата „Гунвор“, Торбјорн Торнквист, изјави дека средствата на Лукоил, кои неговата компанија планира да ги стекне, нема да бидат вратени на руската компанија дури и ако Западот ги укине санкциите врз руската нафта.

„Лукоил“ минатата недела објави дека ќе ги продаде своите странски средства на „Гунвор“.

Опсегот на продажбата вклучува бунари, рафинерии, бензински пумпи и портфолија на берзата, додека условите на договорот не се откриени.

- Ова е јасен прекин - кога договорот ќе стапи на сила, тој е конечен - рече Торнквист во интервју за „Блумберг ТВ“.

Тој нагласи дека западните регулатори немаат причина да бидат загрижени за руското влијание врз средствата по продажбата и ја исклучи можноста „Лукоил“ да го врати пристапот до кој било од тие средства, дури и ако санкциите бидат укинати.

„Им даваме гаранции дека ова нема да се случи“, рече Торнквист, додавајќи дека компанијата е уверена дека договорот ги опфаќа сите клучни аспекти на трансакцијата.

Соединетите Американски Држави минатиот месец ги ставија Лукоил и Роснефт на списокот на санкционирани субјекти, како дел од притисокот врз Москва поради војната во Украина.

Понудата на Гунвор сега чека одобрување од Канцеларијата за контрола на странски средства (OFAC) на Министерството за финансии на САД.

„Гунвор Груп“ е меѓународна компанија за трговија со нафта и деривати, регистрирана на Кипар, со седиште во Женева.

Основачот на компанијата, шведскиот државјанин Торбјорн Торнквист, ја основал во 2000 година заедно со рускиот бизнисмен Генадиј Тимченко.

Фото:Гунвор