Новоименуваниот амбасадор на Соединетите Американски Држави Џес Бејли кој доаѓа на местото на досегашниот амбасадор Пол Волерс му ги предаде акредитивните писма на претседателот Иванов и официјално стапи на должност.

Бејли истакна дека Македонија и САД имаат многу заеднички нешта, како што се разновидна популација со различни етнички групи, религии и традиции, кои ги зајакнуваат и ги збогатуваат двете земји, додавајќи дека ние сме партнери и сојузници во секој поглед.

„Со нетрпение очекувам да работам со Вас, со Владата и со народот на Македонија, со цел да продолжи оваа традиција на партнерство. Повеќе од 20 години, минувајќи и низ тешки времиња, работевме заедно и постигнавме многу во реализацијата на заедничките цели, особено за изградба на Европа, обединета, слободна во мир, и со Македонија целосно интегрирана во НАТО и во ЕУ. Оваа работа се темели на нашата заедничка посветеност кон придржување на демократијата, индивидуалните слободи и владеење на правото. Како што односите меѓу нашите земји растат и се развиваат, така нашите заеднички вредности потврдуваат дека ние и понатаму ќе останеме блиски", истакна во говорот амбасадорот Бејли.

Претседателот Иванов, пак, го нагласи значењето на поддршката и ангажманот од Соединетите Американски Држави како стратегиски партнери во реализација на нашите надворешно политички цели и приоритети - интеграцијата во евроатлантските структури, добрососедските односи и регионалната соработка.