Околу шеснаесет акционери на ,,Макпетрол’’ се придружија на кривичната пријава на Министерството за внатрешни работи против раководството на компанијата. Тие велат дека целта им е да си ги остварат правата како акционери и ги повикаа и останатите вработени кои имаат акции да се придружат на тужбата. Сметаат дека компанијата ќе банкротира ако не преземат некоја решителна акција. – Поради незаконско работење и систематско уништување на нашата компанија, поднесена е кривична пријава против генералниот директор и членовите на управниот и на надзорниот одбор на „Макпетрол“, на која, според наше мислење, се чекаше премногу. Но, сепак, првпат досега, Jавното обвинителство нè повика и нас, дел од акционерите, да дадеме свој исказ за овој, за нас, многу важен случај – изјави Мира Данаилова, акционер во „Макпетрол“. Според овие акционери, компанијата во изминатите шест години изгубила 15 милиони евра и покрај тоа што приходите растеле. Тие веруваат дека на овој начин преку судска постапка ќе се заштити капиталот на компанијата, а и нивните права како акционери. Инаку, пред два месеца, МВР поднесе кривична пријава против десет членови на Управниот одбор на компанијата и осум на Надзорниот,  за незаконско прелевање на капитал од „Макпетрол“ во „Оилко“.