Нови цени на горивата има од вечерва на полноќ.

Бензинот ќе поевтини за еден денар по литар, а дизел горивото за 1,5 денари по литар. Поевтинувањето е поради намалувањето на цените на светските берзи, велат од Регулаторната комисија за енергетика.

Комисијата информира дека во изминатиот седумдневен период референтните цени на светските берзи во просек бележат намалување: кај бензинот за 4,255 отсто, кај дизелот за 5,212 отсто, кај екстра лесното масло за 5,258 отсто и кај мазутот за 4,219 отсто.

Малопродажните цени на бензините ЕУРОСУПЕР БС-95, ЕУРОСУПЕР БС-98 и на Екстра лесното масло за домаќинство (ЕЛ-1) се намалуваат за 1,00 денар/литар, додека малопродажната цена на ЕУРОДИЗЕЛ (Д-Е V) се намалува за 1,50 денар/литар, соопшти Регулаторната комисија за енергетика и наведе дека се намалува и цената на мазутот.

Од ноќеска по полноќ максималните цени на нафтените деривати ќе изнесуваат:

Моторен бензин ЕУРОСУПЕР БС - 95 66,00 (денари/литар)

Моторен бензин ЕУРОСУПЕР БС -98 68,00 (денари/литар)

Дизел гориво ЕУРОДИЗЕЛ БС (Д-Е V) 55,00 (денари/литар)

Масло за горење Екстра лесно 1 (ЕЛ-1) 44,50 (денари/литар)

Мазут М-1 НС 34,426 (денари/килограм)