Од полноќ следува ново поскапување на горивата, а најголем скок има кај дизелот, кој се зголемува за дури 5,5 денари за литар.

Според новата одлука на Регулаторната комисија за енергетика, ЕУРОДИЗЕЛ БС од утре ќе се продава по највисока цена од 88 денари за литар, наспроти досегашните 82,50 денари.
Поскапуваат и бензините. ЕУРОСУПЕР БС-95 се зголемува за 1,5 денари и ќе чини 87 денари за литар, додека ЕУРОСУПЕР БС-98 ќе се продава по 89 денари за литар.

Екстра лесното масло за домаќинство поскапува за 4,5 денари, на 86 денари за литар. Цената на мазутот се зголемува за 0,938 денари за килограм и достигнува 42,168 денари.

РКЕ соопштува дека малопродажните цени на нафтените деривати во просек се зголемуваат за 3,59 отсто во однос на цените утврдени на 6 јули. Во образложението се наведува значително зголемување на референтните цени на светскиот пазар, особено кај дизелот, каде растот изнесува 11,01 отсто.

Ова е второ поскапување за само една недела. Со одлуката од 6 јули дизелот веќе поскапе за 2,5 денари, бензините за еден денар, а екстра лесното масло за два денари.

Новите цени ќе се применуваат од 00.01 часот на 14 јули.