Големите градови во Германија нудат многу работни места и бројни содржини за слободно време, но екстремно високите кирии го отежнуваат животот. Цените на закупнините ги одвраќаат вработените и им создаваат сериозни проблеми на компаниите кои се во потрага по стручна работна сила.

Многу луѓе ги сметаат скапите станови за главен недостаток на животот во урбаните средини, покажа истражувањето на консултантската куќа „PwC“ (PricewaterhouseCoopers).

Пронаоѓањето стан – „чиста среќа“

„Висината на кириите и тешкотиите при наоѓање пристапен стан во урбаните подрачја и понатаму се огромен извор на фрустрација меѓу вработените“, вели Бернд Розе, директор на „PwC“ за Франкфурт.

Истражувањето се спроведува веќе три години, а според Розе, проблемот дополнително се влошил. Во анкетата учествувале 4.000 вработени на возраст меѓу 18 и 65 години од 12 градови со најмалку половина милион жители, меѓу кои Берлин, Хамбург, Франкфурт, Минхен, Есен, Лајпциг и Хановер.

Големо мнозинство од испитаниците го сметаат животот во голем град за пријатен поради можностите за шопинг, културната и образовната понуда, како и близината до работното место. Околу 89% од нив се изјасниле дека се чувствуваат добро во местото каде што живеат.

Сепак, две третини се незадоволни од закупнините и ограничената понуда. Дури 87% од испитаниците изјавиле дека во големите градови е „чиста среќа“ да се најде стан по прифатлива цена.

Предизвик за работодавачите и политичарите

Поради високите трошоци за домување, некои вработени веќе преземаат конкретни чекори. Според истражувањето, 37% од испитаниците веќе размислувале за промена на работата, додека 10% веќе се преселиле поради оваа причина. Меѓу младите на возраст од 18 до 34 години, секој петти веќе направил таков потег.

Осум од десет вработени сметаат дека тензичната ситуација на пазарот на недвижности е сериозна пречка за привлекување и задржување на стручен кадар. При барање нова работа која бара преселба, за половина од нив висината на киријата е пресуден фактор, поважен дури и од оддалеченоста до работното место.

Што се очекува од државата и компаниите?

Учесниците во истражувањето сметаат дека и работодавачите и политичарите мора да се вклучат во решавање на проблемот:

88% поддржуваат јавна изградба на станови за лица со ниски и средни приходи.

85% поддржуваат пренамена на канцеларискиот простор во станбен.

83% сметаат дека компаниите треба да субвенционираат дел од киријата на вработените.

80% изјавиле дека работодавачите треба да ги покриваат трошоците за превоз или да обезбедат службени станови.