Нов бран на кадровски промени се најавува во ВМРО-ДПМНЕ. Ќе се менуваат директори на дваесетина претпријатија.Веќе се сменети повеќе високи службеници во администрацијата во Валандово, како и  директорот на Водостопанство Берово. На прес-конференција, актелниот министер за здравство и член на ИК на ВМРО ДПМНЕ,  Никола Тодоров изјави дека кадровското „освежување“ продолжува. „Во изминатиот период ВМРО-ДПМНЕ имаше можност да ја согледа успешноста на работата на функционерите кои беа именувани и врз основа на тоа да донесе одлука за промени во одредени области. Смените на досегашните функционери беа резултат на нивната неможност да одговорат на темпото на работа на ВМРО-ДПМНЕ и на одредени објективни слабости или недоволна посветена работа, што е во целосна спротивност на основните принципи на делување на партијата“, изјави Тодоров. Кадровски промени  ќе има и во Агенцијата за катастар во Демир Хисар, во Јавното комунално претпријатие во Градско, Облешево, Василево. Се менува двајца директори во ЈП Водовод Скопје, раководителите на Фондот за здравство и шумска полиција во Струмица, а во Велес раководителот на подрачното одделение на Агенцијата за вработување. Промени ќе има во Неготино, Охрид, Кисела Вода. „Ваквата работа на ВМРО-ДПМНЕ за кадровска обнова е во правец на продолжување на успехот со несмален интензитет, но истовремено надминување на сопствените грешки, се со цел постигнување уште подобри резултати во континуираните промени и реформи. Со тоа истовремено се гарантира и продолжување на чесниот, отчетниот и работливиот пристап, но и отвореноста во работата на ВМРО-ДПМНЕ“, вели Тодоров. За СДСМ пак, новиот бран е признание од ВМРО-ДПМНЕ за катастрофалната кадровска политика. „Очајните резултати на локално и национално ниво на ВМРО-ДПМНЕ, меѓу другото, се производ и на ваквата лоша кадровска политика“, реагираат од опозицијата.